ភ្នំពេញ៖ មន្ទីរសម្រាកព្យាបាល និងសម្ភព «សុវណ្ណឌីចោមចៅ» ស្ថិតនៅតាមបណ្ដោយមហាវិថីឈ្នះឈ្នះ ភូមិជម្ពូវ័ន សង្កាត់ចោមចៅទី៣ ខណ្ឌពោធិ៍សែនជ័យ រាជធានីភ្នំពេញ បានរងការចោទប្រកាន់ពីក្រុមគ្រួសារជនរងគ្រោះថា គ្មានជំនាញនិងធ្វេសប្រហែស បន្ទាប់ពីក្រុមគ្រូពេទ្យនៅទីនោះ បានធ្វើការវះកាត់លើស្រ្តីម្នាក់ដែរឈឺពោះសម្រាលកូន ក្រោយពីធ្វើការវះកាត់ស្ត្រីរងគ្រោះបានក្លាយជាជនពិការស្លាប់១ចំហៀងខ្លួននឹងបាត់បង់ការចងចាំ ស្ទើរតែស្លាប់ទាំងវ័យក្មេងបាត់ទៅហើយ។
ចំណែកក្រុមគ្រួសារជនរងគ្រោះ បានទៅសុំឲ្យគ្រូពេទ្យ និងម្ចាស់មន្ទីរសម្រាកព្យាបាល និងសម្ភព «សុវណ្ណឌី ចោមចៅ» ទទួលខុសត្រូវលើករណីនេះ។ តែក្រុមគ្រូពេទ្យមិនព្រមទទួលខុសត្រូវ និងអះអាងថា ឲ្យគ្រូពេទ្យធ្វើយ៉ាងម៉េច ព្រោះវាជារឿងអ្នកជំងឺ ហើយបែរជានិយាយថាអ្នកជំងឺកើតព្រាយក្រឡាភ្លើងទៅវិញ!។
ស្រ្តីរងគ្រោះឈ្មោះ សាត ស្រី អាយុ២៥ឆ្នាំ មានប្តីឈ្មោះ ម៉េង បញ្ញា អាយុ២៧ឆ្នាំ បច្ចុប្បន្នរស់នៅភូមិត្រពាំងអញ្ចាញ សង្កាត់ត្រពាំងក្រសាំង ខណ្ឌពោធិ៍សែនជ័យ រាជធានីភ្នំពេញ។
នៅរសៀលថ្ងៃទី២០ ខែឧសភា ឆ្នាំ២០២០នេះ លោក សាត ណាត អាយុ៤៧ឆ្នាំ ត្រូវជាឪពុកបង្កើតរបស់ស្រ្តីរងគ្រោះ បាននិយាយថា កូនស្រីរបស់លោក ទើបតែមានផ្ទៃពោះសម្រាលកូនលើកដំបូង ហើយនៅវេលាម៉ោង ៩ព្រឹកថ្ងៃទី១១ ខែឧសភា ឆ្នាំ២០២០ កូនស្រីបានឈឺពោះ ហើយបានទៅសម្រាលនៅមន្ទីរសម្រាកព្យាបាល និងសម្ភព «សុវណ្ណឌី ចោមចៅ»។
ពេលនោះក្រុមគ្រូពេទ្យបានពិនិត្យហើយប្រាប់ថា កូនលើសថ្ងៃកើតហើយ អត់ព្រមកើត ហើយសុខភាពមិនសូវល្អ គឺខ្សោយណាស់ បើកើតធម្មជាតិមិនល្អទេ គឺតម្រូវឲ្យវះកាត់ បើមិនវះកាត់ទេ គឺកូនគាត់អាចប្រឈមនិងការបាត់បង់ជីវិត។
បន្ទាប់ពីឮគ្រូពេទ្យប្រាប់បែបនេះ ទើបក្រុមគ្រួសារព្រមឲ្យពេទ្យធ្វើការវះកាត់ ហើយពេទ្យបានធ្វើកិច្ចសន្យាផ្ដិតមេដៃ និងប្រគល់លុយថ្លៃវះកាត់ចំនួន ៦៥០ដុល្លាររួចរាល់នៅវេលាម៉ោង ១២ថ្ងៃត្រង់ថ្ងៃដដែល ក៏ចូលបន្ទប់វះកាត់រយៈពេលប្រហែល ២០នាទីទៅកន្លះម៉ោងទើបរួចរាល់។
លោក សាត ណាត បានបន្តទៀតថា ក្រោយពីវះកាត់យកកូនចេញរួច រយៈពេលប្រហែល១ម៉ោងក្រោយមក កូនស្រីគាត់ចាប់ផ្ដើមធ្វើទុក្ខឈឺចុកចាប់ក្នុងពោះយ៉ាងខ្លាំង គាត់និងក្រុមគ្រួសារក៏សួរនាំព្រោះ បារម្ភពីអាការៈកូនស្រី ខណៈនោះពេទ្យបានប្រាប់ថា តាមដានបន្តិចសិន ការវះកាត់ គឺតែងតែមានការឈឺចាប់បែបនេះឯង។
ក្រោយពីសង្កេតឃើញអាការៈកូនស្រីឈឺចុកចាប់កាន់តែខ្លាំងលោកសាត ណា ក៏បានស្នើសុំឲ្យបញ្ជូនកូនទៅរកមន្ទីពេទ្យធំៗ ដែលមានជំនាញជាងនេះ ប៉ុន្តែពេទ្យនៅបន្តថា តាមដានសិន និងអះអាងថា កូនស្រីគាត់កើតព្រាយក្រឡាភ្លើងទៅវិញរហូតដល់វេលាម៉ោង ៦ល្ងាចថ្ងៃដដែល កូនកាន់តែធ្ងន់ធ្ងរទៅៗ គាត់ក៏និយាយថា «បើសិនជាកូនស្រី ខ្ញុំមានបញ្ហាអ្វីកើតឡើង ខ្ញុំនឹងប្ដឹងពេទ្យហើយ»។ ទើបពេលនោះក្រុមគ្រូពេទ្យ បានទាក់ទងហៅរថយន្តសាមុយ មន្ទីរពទ្យព្រះកុសុមៈ (មន្ទីរពេទ្យលោកសង្ឃ) មកដឹកយកកូនស្រីគាត់ទៅសង្រ្គោះបន្ទាន់ដោយមានគ្រូពេទ្យម្នាក់ទៅជាមួយដែរ។
ប៉ុន្តែពេលទៅដល់មន្ទីរពេទ្យព្រះ គ្រូពេទ្យម្នាក់នោះទុកកូនគាត់ចោលរួចចាកចេញទៅបាត់។ ចំណែកគ្រូពេទ្យព្រះកុសុមៈ បានប្រាប់គាត់ថា កូនស្រីគាត់មានឈាមហូរដក់ក្នុងចូលស្បូនច្រើន ទើបចុកព្រមទាំងដាច់សសៃឈាមថែមទៀត ហើយគ្រូពេទ្យនៃមន្ទីរពេទ្យព្រះកុសុមៈ បានធ្វើការវះកាត់ឡើងវិញ យកឈាមនោះចេញព្រមទាំងកាត់ស្បូនចោលតែម្ដង ទើបរួចផុតពីស្លាប់ ប៉ុន្តែស្លាប់១ចំហៀងខ្លួន និងមានសតិខុសប្រក្រតីដូចជាក្មេងអាយុ២ឆ្នាំអញ្ចឹង។
ឪពុករូបនេះបាននិយាយទៀតថា រយៈពេល៩ថ្ងៃហើយ មិនដែលឃើញក្រុមគ្រូពេទ្យ និងម្ចាស់មន្ទីរសម្រាកព្យាបាល និងសម្ភព «សុវណ្ណឌីចោមចៅ» មិនបានមកអើពើទៅសួរនាំឬមើលនោះឡើយ ពេលនេះគាត់បានសុំឲ្យទទួលខុសត្រូវ ប៉ុន្តែគ្រូពេទ្យទាំងនោះមិនព្រមឡើយ។
គាត់ក៏មានការសោកស្ដាយខ្លាំងណាស់ដែលចូលចំពេទ្យដែលគ្មានជំនាញបែបនេះ ដូច្នេះគាត់សំណូមពរសុំឲ្យក្រសួងសុខាភិបាលជួយរកយុត្តិធម៌ជូនកូនស្រីគាត់ផង។ យ៉ាងណាក៏ដោយយើងមិនទាន់អាចសុំការបកស្រាយបាននោះទេពីខាងក្រុមគ្រូពេទ្យបាននៅឡើយ ពាក់ព័ន្ធនឹងការចោទប្រកាន់របស់ឪពុកជនរងគ្រោះខាងលើអង្គភាពយើងនឹងរង់ចាំការបកស្រាយពីសាម៉ពាក់ព័ន្ធរាល់ម៉ោងធ្វើការ៕
